Kauli hiyo imetolewa na Kamanda wa Polisi Mkoa wa Mjini Magharibi, Unguja Kamishna Msaidizi wa Polisi ACP Richard Thadei Mchomvu wakati akitoa ufafanuzi wa video clip iliyosambaa kwenye mitandao ya kijamii ikidai Jeshi hilo limeshindwa kumpata kijana aliyetekwa.
Kamanda Mchomvu amesema tukio la kutoweka kwa kijana huyo liliripotiwa tarehe 07 Februari 2024 katika kituo cha Polisi Mazizini.
“Mripoti ambaye ni kaka wa kijana aliyetekwa alidai mdogo wake Yasri Ali Seif (23) ametekwa majira ya 11 alfajiri wakati akielekea Kizingo kwenye shughuli zake za kila siku na watekaji walitaka fedha shilingi laki sita ndipo wamuachie” alisema kamanda Mchomvu.
Amefafanua kwamba baada ya kupokea taarifa hiyo ufuatiliaji wa simu iliyofanya mawasiliano ulianza na kufanikiwa kubaini alipo kijana huyo.
Kijana huyo alitumiwa fedha shilingi laki mbili na kaka yake wakiamini kwamba wanawatumia watekaji na baada ya siku tatu kijana huyo alipatikana, alipohojiwa alieleza kwamba hakutekwa bali alijiteka ili apate fedha za kuanzia mtaji wa huduna za kifedha.
Hivyo Jeshi la Polisi linaendelea kulaani kitendo cha kutumia mitandao ya kijamii kupotosha na kwa lengo la kuharibu taswira ya taasisi za serikali.
Aidha, Kamanda Mchomvu amesema juhudi za kumkamata aliyesambaza video clip hiyo ya uzushi zinaendelea ili hatua kali za kisheria zichukuliwe.
